Onè ak respè pou pwofesè Yves Dejean

Pwofesè Yves Dejan ak Emmanuel Stephane Laurent.

 

Fanmi, zanmi ak kolèg te reyini maten mèkredi 4 avril 2018 nan legliz Saint Louis Roi de France pou te bay pwofesè Yves Déjean yon denye òmaj. Pè William Smarth te retounen sou pakou koken chen nèg sa a ki te fè yon gwo travay pou lang ak kilti kreyòl ka vanse nan peyi Ayiti. Si pou moun ki te la yo, antèman an se yon fason pou di pwofesè a bon travesè, pou mwen ki t gen chans fè konesans avè l lè m te etidyan nan pwogram lisans CAEF Ecole Normale Supérieure ak Université Antilles Guyanes lanmò « Papi Yves » (se konsa m te konn rele l) kite yon tou san fon nan lavi m.

Pou moun ki pat konnen l, malgre pwofesè Yves Déjean te ala retrèt, li te asepte ban m kou lengwistik an prive lakay li pou m te ka vanse nan konpreyansyon pwoblèm lang kreyòl nan peyi sa a. M ka di malgre m pa etidye lengwistik nan Faculté de Linguistique Appliquée, gras ak pwofesè Yves Déjean ak bon jan kou pwofesè Renauld Govain, m gen tout sa ki nesesè pou m metrize syans langaj moun nan. Papi Yves te fè l ak tout kè l e m panse m t ap engra anpil si m pa bay lajenès peyi Ayiti temwayaj sa a.

Tout vi mesye sa a se yon fason pou l bay lang ak kilti kreyòl la jaret. Se nan sans sa m pase li ekri pi bon liv li nan kreyòl : Yòn lekòl tèt anba nan yon peyi tèt anba ([2006, 2013)! Li pwouve li se yon gwo militan ki t ap goumen pou lang pèp la gen plas nan sosyete ayisyen an. E jounen jodi a m kapab di tout jèfo l pa pèdi paske gen yon pakèt gwo lengwis k ap swiv tras li tankou Lemèt Zefi, Michel Degraff, ….

Mwen konnen jodi a gen moun ki kapab bliye l men sa m sèten k ap rete aprè lanmò l se sosyete ayisyen k ap fini pa pran konsyans nou p ap jamè ale lwen ak franse a, se nan kreyòl pou n fè edikasyon pèp la.

Al anpè Papi Yves, ayibobo pou wou!

Emmanuel Stephane Laurent

Commentaires